Esta ruta urbana ofrece vistas panorámicas, arte urbana e natureza, coas ruínas dun acueduto romano como atractivo destacado. Ideal para o turismo cultural e...

As Alturas de Garabolos é un roteiro que nos saca do centro de Lugo para levarnos á maior altura da zona urbana da cidade, dende a que poderemos gozar de amplas vistas do propio centro, do val do Miño e dos arredores. PERCORRIDO Este percorrido comeza na primeira das portas modernas da Muralla, e que por outro lado foi a última delas en reformarse (nos anos 60 do século XX): a porta de San Fernando. Dende ela atravesaremos todos os barrios da Avenida da Coruña, unha das zonas con máis densidade de poboación da cidade. Neste treito inicial poderemos gozar da arte do Primo de Bansky (na Casa da Muller), de Diego AS e Nesui (no centro María Mariño), de Leandro Barea (no Agro do Rolo) ou de Lidia Cao (na gran medianeira do 228 da Avenida). Tamén de pequenos paseos culturais como o das Palabras Galegas do Ano (rúa Menorca) ou o do Cine (na entrada do Parque da Milagrosa). Chegados á praza da Medusa entraremos na parte plenamente natural do noso percorrido, no que transitaremos polo rueiro rural dos barrios de Garabolos, da Piringalla, da Abella e do Castiñeiro. Un circuito turístico cheo de arte, mundo rural e natureza. Mención especial aos restos do antiguo acueduto romano, coincidente en grande medida coa actual predisposición dos depósitos da auga do propio barrio de Garabolos.